Cerrar Cerrar Botón

Cerrar Cerrar Botón

Festival Nel Amaro

Teatru Profesional en Llingua AsturianaCARTEL NEL AMARO

Nel añu 2017, el Gobiernu del Principáu decidió fundar un premiu pa impulsar el teatru profesional nes llingües propies d’Asturies. Esti premiu, amás, había dir vinculáu a un festival onde’l públicu pudiere ver representaes les obres candidates.
De la mesma manera, decidióse dedicar el premiu y festival a la figura de Nel Amaro, como autor fundamental na renovación del teatru asturianu y la so incorporación a la época contemporánea, más p’allá de los márxenes estrechos del teatru costumista nos qu’hasta’l momentu se movía l’actividá escénica en llingua asturiana.
Dende entós, a esti premiu puen presentase compañíes profesionales de teatru con obres yá estrenaes escrites orixinalmente n’asturianu o en gallego-asturianu o eonaviegu, o traducíes d’otres llingües.

Teatru Filarmónica (Uviéu). Entrada llibre

Vienres 27 de septiembre, y 4, 11, 18 y 25 d´ochobre

PROGRAMACIÓN COMPLETA

Amanda y les castañes maxiques

Ficha Técnica y artística

  • Autoría y dirección: Pedro Durán
  • Repartu: Arantxa Fernández Ramos, Gemma de Luis y Pedro Durán
  • Técnicu: Carlos Dávila
  • Escenografía: HO Estudio
  • Vestuariu: Azucena Rico
  • Selección musical: Katia Aboli

Amanda y les castañes máxiques (finalista)

27 de Septiembre - 18:30 h
Ambigú Media Broadcast

Ambigú Media Broadcast ye una compañía profesional de teatru fundada nel añu 2009 pol actor y productor Pedro Durán. Ambigú Media Broadcast tien producíes cuatro comedies pa tolos públicos: Poison, Fame, Pero mira cómo beben y Violeta: historia de una tanatopractora (nominada con dos premios OH!). Amás tien tamién dos espectáculos infantiles: La luna de Nela y Amanda y les castañes máxiques; y un drama, T R E S (producíu en collaboración col centru de recursos escénicos del Principáu d’Asturies na Llaboral).
Ambigú Media Broadcast orienta tolos sos espectáculos al gran públicu, cola mira de divertir y entretener. Trabayen siempre sobre testos orixinales y dramaturxa inédito; y intenten arrodiase nos sos proyectos de grandes profesionales vinculaos a les artes escéniques asturianes.

Sinopsis
Amanda ye una neña que vive con so madre embaxo un horru; so padre morrió y tán pasando munches necesidaes, polo que la única solución que tienen pa poder siguir ye vender la única pita que-yos queda. Con esti fin Amanda marcha cola pita pal pueblu, pero pel camín atopa un vieyu misteriosu que-y ufierta camuda-y la pita por unes castañes máxiques. A Amanda paeció-y una bona idea y, contenta, tornó pa la so casa. A so ma nun-y paeció bien el cambiu, enfadóse cola fía y llanzó les castañes pela ventana pa fuera de la casa. Al otru día, les castañes medraren, hasta’l cielu creció una castañar xigante; ¡yeren máxiques de verdá! Amanda esguiló pel árbol y… ¿qué aventures-y esperen no alto?

Perendi (Finalista)

4 d’ochobre 20:00 h.  Adultos +18
La Compañía del Alba


Carlos Alba “Cellero” ye un actor especializáu en trabayos unipersonales de teatru narrativu y de títeres, xuglaría, monólogu y cuntacuentos. Nel añu 2022 entama col so proyectu de compañía teatral: La Compañía del Alba.Trabaya n’asturianu, castellanu y gallego-asturianu. Sofítase na propia tradición escénica del país, como ye’l casu del monólogu y el teatru popular. Coles sos obres Llázaro de Tormes (2017) y Les madreñes vacíes (2022) resultó ganador del Premiu Nel Amaro de Teatru profesional en llingua asturiana.
Amás nel añu 2021 creó y interpretó la serie infantil Animalada Xabaz, pa la Televisión del Principáu d´Asturies (TPA), xunto a la productora Covenant Audiovisuales.

Sinopsis
Marina quier escapar de Perendi. L’ansia d’esperiencies de la mocedá, el brillu del gran mundu y un futuru idealizáu d’éxitos profesionales llámenla alantrones, embúrrienla pa dexar atrás el valle natal. Pero, enantes de marchar, tien que buscar, xusto en Perendi, la materia pal trabayu d’investigación que-y facilite acceder a una plaza d’investigadora asociada na Universidá de Wisconsin: la obra pictórica d’un estrambóticu artista siriu inmigráu nel conceyu, dotáu del don de la profecía pictórica y augur de defunciones y catástrofes. Pelos cuadros d’Ahmad Rami desfila una sociedá semirrural decadente que, como caún de los sos componentes, muerre d’una manera tan irremediable como ridícula.
La obra ye una adaptación escénica d’una parte de los relatos publicaos por Milio Rodríguez Cueto, nel diariu La Nueva España, ente los años 2000 y 2010.

Perendi

Ficha técnica y artística

  • Autoría: Milio Rodríguez Cueto
  • Dirección: Carlos Alba “Cellero”
  • Repartu: Carmen Gloria, Cova Cobos, Carlos Alba
  • Dirección actoral: Lidia Otón
  • Artista plásticu: Nacho Suárez (BlancoBuría)
  • Ayudante de dirección: Diego Lombardía
  • Diseñu d’illuminación: Rafa Escheverz
  • Escenografía: Nacho Suárez, La Compañía del Alba
  • Vestuariu: Ana Lamela, La Compañía del Alba
  • Voz n’off: Diego Lombardía
  • Grabación de guitarra: Pol Fernández

gasolina con capullos

Ficha técnica y artística

  • Autoría: Roberto Corte y Chechu García
  • Dirección: Laura Iglesia
  • Repartu: Carla Loga, Sidahmed Matala, Carlos Dávila y Félix Corcuera.
  • Diseñu d’illuminación: Carlos Dávila
  • Escenografía: Nuria Trabanco
  • Vestuariu: Azucena Rico

Gasolina con capullos (Finalista)

Vienres 11 d’ochobre - 20:00 h. Adultos +18
Higiénico Papel Teatro

Ventiocho años d’esperiencia ininterrumpida y más de cuarenta y cinco espectáculos producíos y estrenaos, siempre con gran éxitu de públicu y crítica, avalen la trayectoria d’Higiénico Papel Teatro, compañía con un ampliu repertoriu que destaca pola diversidá temática y espresiva de les propuestes, siempre marcaes por un elegante sellu personal que conxuga toques d’humor, provocación y poesía. Los sos espectáculos tán respaldaos por numberosos gallardones, ente ellos, el Premiu Nel Amaro de teatru profesional en llingua asturiana con Hansel y Gretel (2018) y El viaxe de Covaletti (2020).

Sinopsis
Nun chigre ensin nome, de madrugada, atópense dos personaxes ensin muncho que perder: Ana, una muyer sola, qu’afuega la pena n’alcohol y que nun dexa de buscase problemes por dicir les verdaes ensin filtros, y Mohamed, un mozu inmigrante africanu qu’intenta, ensin éxitu, sobrevivir vendiendo flores pelos chigres de la ciudá. Ente estos dos personaxes, empobinaos al fracasu y prácticamente escluyíos de la sociedá, va surdir un vínculu de complicidá que va xunilos a lo llargo d’una nueche aciaga. Gasolina con capullos ye una traxedia urbana contemporánea tiñida d’humor agriduz que trata dellos temes d’ámbitu social, como la inmigración, la esclusión y les desigualdaes, pero tamién la soledá y la falta d’esperanza ante les poques mires de futuru de les persones desfavorecíes y discriminaes por xéneru, raza o cualesquier condición.

Formigues (finalista)

Vienres 18 d’ochobre - 18:30 h. Tolos públicos
Elektra Fiktion

ElektraFiktion ye una compañía de creación recién, pero formada por profesionales con una esperiencia bien amplia en dellos campos de les artes escéniques, dende la interpretación al movimientu, amás de l’animación, la docencia, la esperimentación o la creación multimedia. El so oxetivu ye’l desenvolvimientu d’un universu personal a partir de la innovación, la busca y la investigación, igual que la esploración de llinguaxes nuevos, ensin escaecer el compromisu social.

Sinopsis
Ello yera una vez un formigueru onde vivíen trés formigues: Gabriela, Graciela y Gloria. Tolos díes, de manera organizada y puntual, facíen les mesmes xeres: trayíen cebera p’almacenar, iguaben el formigueru y abastecíenlu de tolo necesario. Cuando llegaba la nueche taben tan baldaes que s’echaben y poníense a roncar. Pela mañana, facíen la so rutina, y asina día tres día, selmana tres selmana, añu tres añu… Hasta qu’un bon día Graciela trai una cosa qu’enxamás vieren… Entama la comunicación, el pensamientu, y empieza la toma de conciencia como individuos… ¿Qué pasa entós col formigueru?

Formigues

Ficha técnica y artística

  • Autoría y dirección: Rosa Ana Muñoz
  • Repartu: Lucía Colunga, Sheila Montes y Rosa Ana Muñoz
  • Diseñu d’illuminación: Alberto Ortiz
  • Escenografía y atrezu: Nuria Trabanco
  • Vestuariu: Azucena Rico
  • Música: Valeria Val

gorrumbu

Ficha técnica y artística

  • Dirección: Juan Mortera
  • Autor: Luis Alija
  • Traducción al asturianu: Laura Iglesia
  • Repartu: Carla Loga, Enrique Dueñas
  • Illuminación y dirección técnica: Carlos Dávila
  • Escenografía: Nuria Trabanco
  • Vestuariu: Azucena Rico
  • Música: Álvaro Bárcena

El gorrumbu (función de pieslle, ganadores del Premiu Nel Amaro 2023)

Vienres 25 d’ochobre - 18:30 h. Tolos públicos
Saltantes Teatro

Saltantes son Nerea Vázquez y Luis Alija. Como compañía naz nel 2013 y dende entós tienen producíos más de diez espectáculos ente los que destaquen El método Grönholm, Gigantes, el musical y Las canciones que les cantaban a los niños. Pa públicu familiar crearon los espectáculos Cuento de Navidad de Charles Dickens y ¡Shakes-Vantes! Shakespeare y Cervantes. Todo lo que siempre quisiste saber sobre ellos y el profesor nunca te enseñó. Con El gorrumbu adientráronse nuna adaptación pa tola familia de la novela Notre Dame de Paris de Víctor Hugo, con una escenografía que recrea la mesma catedral. Esti espectáculu fízolos ganadores del VII Premiu Nel Amaro de Teatru Profesional en Llingua Asturiana.

Sinopsis
La catedral de Notre Dame, unu de los símbolos culturales d’Occidente, ta arrodiada poles llames. El fueu va tar hores afectando a la cubrición y a tola so estructura. La calor intensa non solo provoca destrucción sinón tamién un viaxe nel tiempu. Les pantasmes, qu’habiten ente les sos piedres, materialícense y lluchen por camudar lo que-yos trai la historia. Quasimodo y Esmeralda van vivir nuevamente la so historia d’amor col deséu de camudar el so destín tráxicu. ¿Sedrán quién a consiguilo? ¿Podrán independizase y escribir un final distintu?